《濁水漂流》開畫票房20萬，
比起好多危危乎嘅電影，
成績都仲要差。
-
根據以往經驗，如果今日、聽日同後日票房無起色，電影下星期開始就會呈現天地場嘅傾向，而兩星期左右，將會接近落畫。
-
開畫數字，喺我預期之內，而最後數字，我亦心中有數，一直以嚟都唔睇好。最主要嘅原因有兩個，第一係電影沉鬱嘅風格，現實生活已經夠慘，點解仲要比錢入場睇啲更慘嘅嘢? 點解要貼錢去折磨自己? 而第二就係電影嘅定位，並唔係老少咸宜，甚至可能會惹嚟衛道之士嘅口誅筆伐，target嘅觀眾群好少。
-
唔睇一套電影可以有好多理由，
但睇一套電影嘅理由可以好簡單。
-
原因，就係《濁水漂流》的確係一套好電影，無論喺演員嘅演出上、劇本上、製作上等，喺香港電影中去計，好標青。而最難能可貴嘅係，觀眾可以喺作品中睇到電影團隊嘅態度，嗰種取態、嗰團怒火，將來嘅香港電影界，可能已經唔比再有。錯就要認，打就要認，我哋可能以為係常識，但事實上，一個道歉，喺國家層面，係可以拖足超過三十年嘅時間，追求政權道歉，可能要用畢生嘅時間，甚至可能掉返轉，法律話比你聽，錯嗰個已經係你，要拉要鎖。
-
廢話少講，對於電影，會再撰文討論，但當務之急，係想大家知道，《濁水》係好電影，睇咗嘅，幫手口耳相傳，未睇嘅，知道有呢套作品嘅存在，幫到嘅嘢，盡幫。
Search